Oleh: Berty Milala (Siak)
Melenget adi kuinget
Naktak iluhku rempet
Nande nina pusuhku
Erlebuh
Ibas aku nuriken perdalan geluhku
Teringet sanga kami kitik denga
Sisada kam encari guna kami
Bapa, bulangendu
Rusur talu erjudi
Erbahanca la lit inganndu ergani-gani
Lanai terbedakenndu suwari ras berngi
Ngepkep kami si atendu jadi
Suari kam encari
Berngi erberngi i juma
Ngingani jaung gelah ula pan wili
Idalanindu gedang-gedang wari
Gelah lit nakan ras uang sekolah kami
Panasndu ei malir rikutken iluh
Ertoto ngarap lit pagi simehuli
Gia kade-kade sada pai la nulih
Endam dalanna aku lawes
Nadingken kuta
Lawes aku nande
Erlajang bana
Mbera Dibata simasu-masusa
Anak sintua i taneh perlajangen sisada
Nande
Totota sindube la sia-sia
Kami anakndu enggo njabuken bana
Kerina ulih latihndu labo beluh kami ngulihkensa
Sada toto, nande, itotoken kami
Sehat-sehat kam duana ras bapa
Terbeluh, nande
Muat ukur permenndu
Ras kerina ukur kelandu
Maka lit pagi inganndu ergani-gani
Lang, adi kami kerina anakndu
Labo luntur, nande
Ate kami keleng man bandu
Pas kal bagi perkeleng atendu ndube
Nangndangi kami
Endam nande
Surat pusuhku man bandu
Kupeseh arah angin sirembus
Kutandatangani, nande
Taru iluhku mambur
gambaran kehidupan nyata dalam puisi
Sungguh mengesankan dari segi isi
Ibas kata sengkebabah
Enggo kerina jadi pedah
Kataken enda man anak-anakdu
Manjar anjar la perlu merudu
MUG