Nisuratken: Elisabeth br Barus
Metempas tuhu kam
mehaga man tatapen
Rawa rampusndu
nggo meneken sura-sura anak singuda
Mehantundu
nggo nadingken ate megogo
Pernembehndu
nggo ncidahken belinna bekas cining mbages
Surut, surutlah kam
o pandikar kerangen
melias ndube taneh ingan kami cio celinggem
la ndube lit gelutna nangndangi kami
Erkusurlah kam manje-anje
pelepas me kami erdalan alu salang
gelah nuanken page ku lebeng
muro page tupung erbeltek beru
mahpah janah rende
rani erjujung nimpa ku lesung
ngataken buah page mbuah
ngataken mbue bujur man si Beru Dayang
O, andiko kam si metempas meparas
simerawa tupung merampus
nggo piga kali matawari pultak seh sundutna
ndigan denga nge kami mulih?
Kerabangen kuta nggo peren
kesain kuta melungen mesuni
kirik ras pet-pet pe nggo mesikel sorana rende
O andiko o andiko ……..
Sinabungku ula merawa
tunduhlah tunduh ula nembeh