Gbkp Bajem Bukit — Sorasirulo
← Beranda
Budaya & Adat · · 3 mnt baca

Gbkp Bajem Bukit

Vic. Kazpabeni Eben Ezer Ginting (Jambi) GBKP Bajem Bukit Rinting e me Bakal Jemaat (perpulungen) si ikepkep GBKP Runggun Jambi, Klasis Sumbagsel (Sumatera b…

Gbkp Bajem Bukit

Vic. Kazpabeni Eben Ezer Ginting (Jambi) GBKP Bajem Bukit Rinting e me Bakal Jemaat (perpulungen) si ikepkep GBKP Runggun Jambi, Klasis Sumbagsel (Sumatera bagian Selatan). Bukit Rinting e me salah sada daerah dataran tinggi si lit i wilayah desa Lubuk Mandarsah. Desa Lubuk Mandarsah terletak i Kecamatan Tengah Ilir Kabupaten Tebo, Provinsi Jambi. I Kota Jambi nari ibutuhken waktu kurang lebih 4-5 jam guna banci seh i lokasi gereja (jarak sekitar 190 KM).

Situhuna, ingan gereja e dauhna lit sekitar 2 Km i uruk si tergelar Bukit Rinting e nari. Sekeliling gereja emekap lahan Hak Guna Usaha (HGU) PT Wira Karyasakti (PT WKS) bage pe kebun-kebun masyarakat si berstatus Hak Pakai (HP). Umumna, masyarakat si tading i je ngusahai lahan alu nuan sawit, karet (rambung) ras pe sayur-sayuren.

Anggota perpulungen GBKP Bukit Rinting pe kerinana erdahin selaku perjuma-juma. Lit deba mulai menggarap lahan dari nol seh asa enggo erbuah sawitna. Lit ka deba reh merantau nukur lahan sawit si enggo siap panen. Tapi bage gia, secara umum hasil perkebunan i wilayah Bukit Rinting enda lenga bo maksimal secara merata. Hasil si enggo lit pe terjeng bias pan denga.

Anggota perpulungen GBKP Bukit Rinting enda lenga bo enterem. Tap bas si la enterem e pe labo kalak Karo saja kerina. Lit deba kalak Toba ras pe Simalungun si cukup angkana cakap Karo. Selain anggota, mekatep nge lit simpatisan si reh pulung bas kebaktin Minggu erkiteken ndauh gerejana. Emakana bahasa pengantar khotbah pe icampur-campur bahasa Karo ras Indonesia.

Tapi, tata ibadah ras ende-enden tetap bahasa Karo (KEE ras PEE). Amin pe sitik denga anggota ngawan perpulungen, tapi semangatna luar biasa. Sebab piga-piga anggota perpulungen e harus menempuh perjalanan 15-20 kilometer alu sepeda motor (erkereta) i rumahna nari ku gereja. Ngelakoken PJJ ku rumah-rumah pe bage kang, serser kerina ikunjungi.

Anggota perpulungen si kalak Karo e pe erbage-bage asalna. Lit i Karo Langkat, Karo Gugung, Singalor Lau ras pe Karo Deliserdang. Amin pe erbage-bage, labo lit pembedaan si mencolok erkiteken bali penggejapen e sebagai perantau.

Selain tenaga Vicaris si tading i jenda, si reh melayani ku GBKP Bukit Rinting e me GBKP Runggun Jambi ras GBKP Rg. KM 46 Muaro Jambi. I bas majekken gereja enda pe tuhu mbue penampat si rehna i GBKP si lit i seputaren provinsi Jambi. Secara khusus dana si terpepulung bas acara Natal Pertama ras pe lelang-lelang si ilakoken tanggal 6 Desember 2014 sangat menolong.

GBKP Bukit Rinting enda memang tergolong daerah PI (Pekabaran Injil). Tapi bage gia, i gereja enda enggo dua kali ilakoken Lakon Persadan Sibadia ras pe sekali Lakon Peridin Mbelin ras pe Peridin Anak Kitik. Bahkan bas tanggal 12 Juli 2015 (wari minggu si reh) ilakoken acara penangkuhen Pertua & Diaken. Dua kalak Pertua ras sekalak Diaken enda me jadi serayan si pemena (periode pertama) bas sejarah pajekna GBKP Bajem/ Perp. Bukit Rinting. Lit pengarapen maka gereja enda berkembang nge pagi dungna ngidah potensi lahan i kuta enda pe cukup mbelang denga si man buaten. // //