Puisi Karo: ERKUNE-KUNE WARI MINGGU (2)

Oleh: H.M. Sitepu

 

Kune Minggu si enda pe lit denga waktu
Enggo me lampas medak nce ersikap merudu
Jingkang Jl. Udara nari pe langkah seribu
Sepatu Jenggel 3 kilo pe menahang bagi abu
Tujun lalap nge ku empak Simpang Tugu
Dage, ijah nge kalak ersiwer kahe kolu
I jah me melala man tatapen dilaki diberu
Banci teman kanam-kanam seh ku tuhu-tuhu

Sekalenda i Tugu timai me kede kopi si arah duru
Pindo sarapen kwetiaw ras bandrek campur susu
Rikut suruh baba perkede 3 batang isap Djisamsoe
Peterlak ka surat kabar Sinar Indonesia Baru
Suar Sair, Abang Djampang, e me leben ituju
Dung e maka Gadis Manis Gila Vespa edisi seratus telu
Kerina tambar lihe tambar ngel-ngel nimai si la tentu
Gelah ola teridah kita medungu ola ka bagi si motu.

La iarap enggo enterem jelma si mulih erminggu
La iarap ku kede ka singuda-nguda si seh mberuna telu
Aku i meja numbur waluh ia kerina i meja numbur pitu
Ikut je sekalak si Minggu si lepus nangkih Vespa mbaru
Iyo oh, la kepe kinata tempa si man daramen reh teraku-aku
Tempa bagi kuan-kuan page namaken bana ku lesung mindo tutu
Sinutu nimai i lesung tading pesikap gegeh nemtemken alu

Mulai me pekeri belas-belas si nggo nderbi pesikap alu erluhu
Perbahan mbiar sekalenda dahin tersia janah cakap njuru
Perkuanken me si mberu telu alu cakap ras logat Julu
Alu mehamat janah la mekarus orati me gelar ras beru
Piah teretteh tutur kepeken teluna anak kalimbubu
Nina pusuh sada lah selketti e me si kundul arah duru
Si tubuhna tanggal sepulu telu emekap wari Cukera Dudu
Rasme Ita br Ginting gerlarna i tampeken bibi si rembah ku lau
La meganjang ersura terjeng guru ope denga erjabu

Kune-kune Minggu enda bagi kune-kune pertiga-tiga tebu
Kune-kunekenna nanam binagana entebu bage nggo tuhu
Minggu si reh mbera ola bagi kuan-kuan pertandang pa tabu
Kune jumpa kin pe la erkuan piah permulih pe la ertentu
Bagem sekalenda kune-kuneku, ugakin kata sorandu?
Selamat wari minggu…………………………………………..

(Depok, wari minggu, bulan sada, tanggal duapuluh pitu)

 

Clip di bawah adalah jawaban Redaksi terhadap puisi di atas (Penyanyi seorang beru Ginting yang memanggil-manggil Mama Karo)

5 thoughts on “Puisi Karo: ERKUNE-KUNE WARI MINGGU (2)

    1. Sabar kam nimaisa ERKUNE-KUNE WARI MINGGU (3). Stock enggo me seh i meja redaksi. Saja, adi amburken kari sekaligus, si malem e pe kari enggo kurang malemna. Sempat kita tertima-tima je kari maka terakap kal permalemna. Tulihken ka, klik ka, enggo nge ndia ndaret sambungenna, ateta ka. Hehehehe …… Meriah ukur kami i dapur redaksi nari kam enggo ertima-tima kerina kerna Kune-kune Wari Minggu enda ndai.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.