Puisi Karo: ERKUNE-KUNE WARI MINGGU (3)

Oleh: H.M. Sitepu

 

Nderbinai erkune-kune me ukur ndahi br Ginting si mberu
Ngikutken singet-singetna Minggu si lepus i kede deher Tugu

 

“Kaka, cakap kede cakap dilaki, la semal bagi kami diberu”
“Gia terjeng jenda lebe sigendeki, sipegedang pagi i jabu”
“Ibas berngi tiga Berastagi, labo ngeskes eruk-eruk pintu”
“Gelah ola tep-tep berngi, sebab la tengka bagi kami guru”
“Labo kam isuriangi, saja terbeluh kam ngatur waktundu”
Bagem ndube cakap nibelas br Ginting, br Biring, br Ribu

Ope berkat nderbinai enggome i pesikap kerina si nasa perlu
Tabas pe enggo ibelas sue pemeteh si niajarken si mada ilmu

“Enda kurudangken rudang kapias, rudang si merupa terpitu
kuturangken kam melias, ermalem ate, gelah cakap pe ertinutu
mari nini Raja Kepultaken ras Kesunduten, temanilah kempundu
adi la kam reh, la aku beluh mbelasken isi ras peraten pusuhku
kulebuh kam kerina, kubasken, rehlah kam ku pertendinku
adi la kam reh, la aku beluh erbahan mejile si asa lit bas dagingku
kulebuh kam kerina, kubasken, rehlah kam ersada ras kulangku”
Dung ertabas pusuh pe longge, takal menahang bagi kalangulu
Itimpus me luah si enggo ndai pesikap telu gulung roti bolu
Iersak me lereng jengki si enggo male janah la ka erlampu

La perban dauhna cur-curen panas tempa asa buah cingkeru
Tapi, perbahan pusuh la siat natap Nde Ginting mberukal tuhu
Amak mbentar man kundulen enggo kimbang arah kenjulu
Natap cirem Nd Ginting menam kundul sope tangtang sepatu
Sepatu kin pe gedangsa tinali enggo ka tempa akap ngganggu
Luah sini ibaba pe menam lupa namakenca ku tengah jabu
Timpus-timpus ndai kin pe gengkenna bel-bel deher pintu
Bagi si kurang rembang katikana maka teridah kerina la erluhu
Dage, inen kin pe ari-ari rembang kepe warina Cukera Dudu

Ibena me ngkunduli amak bengkuang, bekas br Ginting mbayu
Nitatap baju ras abitna corak gadung pulut, nina sigundari ungu
Janah cungainget ras br Ginting iambur me cakap ku kahe kolu
Orat sioraten kerna sembuyak bage ka pe turang pekepar jabu
Sioraten me kuta kemulihen ingan tading kalimbubu anak beru
Enda me kepe bagi kuan-kuan gantang tumba enggo me sertu
Enggo sertu sukaten gantang ras sukaten tumba la lit si moru
Seh ku binuang seh ku kampah sioraten la nilah ia kalimbubu
Piah ersada arih ngaturken pergawah tep-tep wari Minggu

Sekalenda ibelasken kune-kune perdalan Malam Minggu
Ola kita ersoal kune gia sekali la sue ras pusuh peratenndu
Adi gelarna pe erkune-kune, si ugapape banci petudu-tudu
Nuliskenca pe kin pe mon-mon asa dat ukur bagi kalak merudu
Selamat Minggu Pemena, Bulan Dua Tahun Duaribu Sepulu Telu

(Cilangkap,03/02/13)

Inilah jawaban redaksi atas puisi di atas:

 

2 thoughts on “Puisi Karo: ERKUNE-KUNE WARI MINGGU (3)

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.